श्री प. प. श्री वासुदेवानंद सरस्वती टेंबे स्वामी महाराज व श्री प. प. श्रीलोकनाथतीर्थ स्वामी महाराज स्मारक ट्रस्ट, पुणे

आश्रम वृत्त

प. प. श्रीवासुदेवानंद सरस्वती स्वामी महाराजांच्या तमिळ चरित्राचे प्रकाशन

tali-granth-prakashan

परमहंस परिव्राजकाचार्य श्रीवासुदेवानंद सरस्वती स्वामी महाराजांच्या १०४ व्या पुण्यतिथीदिवशी (१३ जुलै २०१८)  प. प. श्री स्वामी महाराजांच्या तमिळ भाषेतील चरित्रग्रंथाचे प्रकाशन संपन्न झाले. चेन्नई येथील पू. रमामाताजी सुब्रमण्यम यांनी हे चरित्र अनुवादित केले आहे.  श्री वासुदेव निवास आणि श्री गजानन महाराज संस्थान, शेगाव यांच्या संयुक्त विद्यमाने हा चरित्र ग्रंथ प्रकाशित करण्यात आला.  यावेळी श्री स्वामी महाराजांच्या ‘मम चित्त स्थिरी कुरु’ या स्तोत्राचे इंग्रजी विवेचन अर्थात Make my mind steady, घोरसंकट निवारक श्रीदत्तप्रितीस्तोत्राचे इंग्रजी विवेचन करणाऱ्या Distress Releving Shree Datta Stotra तसेच ‘Karunatripadi’ या इंग्रजी पुस्तिकांचे आणि कन्नड भाषेतील ‘श्रीदत्तमाहात्म्य’ या ग्रंथांचे प्रकाशन करण्यात आले.  कार्यक्रमास श्री वासुदेव निवासचे प्रधान विश्वस्त प. पू. श्रीशरदशास्त्री जोशी महाराज, पू. रमामाताजी आणि त्यांचे अनुयायी, श्रीगजानन महाराज देवस्थान शेगावचे विश्वस्त श्री गट्टाणी आणि भक्तमंडळी उपस्थित होते. कार्यक्रमाचे सूत्रसंचालन श्री वासुदेव निवासचे विश्वस्त श्री देविदास जोशी यांनी केले.  

महायोग दीक्षाधिकारी संमेलन

sammelan

दि. १३ मे २०१८ रोजी श्री वासुदेव निवास मध्ये कुंडलिनी शक्तिपात महायोग दीक्षाधिकारी संमेलन आयोजित करण्यात आले होते. संपूर्ण भारतातून आलेल्या सुमारे पन्नास दीक्षागुरूंची उपस्थिती या संमेलनाला लाभली. श्रीवासुदेव निवासचे प्रधान विश्वस्त प. पू. श्री शरदशास्त्री जोशी महाराज यांच्या अध्यक्षतेखाली संपन्न झालेल्या या संमेलनाला प्रमुख पाहुणे म्हणून संकेश्वर पीठाचे जगद्गुरू शंकराचार्य महाराज आणि नारायण कुटी, देवासचे प्रधान विश्वस्त प. प. श्रीसुरेशानंदतीर्थ स्वामी महाराज लाभले होते. 

श्री वासुदेव निवासचे विश्वस्त पू. श्री देविदास जोशी महाराज यांनी प्रास्ताविक केले.  प. पू. श्री शरदशास्त्री जोशी महाराज, प. प. श्रीहरिओमतीर्थ स्वामी महाराज, मांडवे, श्रीब्रह्मचैतन्य स्वामी महाराज, छिंदवाड़ा, प. प. श्रीसुरेशानंदतीर्थ स्वामी महाराज, देवास यांनी सहभागी दीक्षाधिकारी मंडळींशी संवाद साधला, त्यांच्या अडचणींवर मार्गदर्शन केले.

संमेलनाचे सूत्रसंचालन पू. श्री प्रमोद कुलकर्णी यांनी केले. विश्वस्त श्री देविदास जोशी यांनी आभार प्रदर्शन केले.